Lushnja Portal » “Gërdeci”

‘Gërdeci’, rrëzohet kërkesa për lirimin e Pinarit dhe Delijorgjit

Enea — Fri, 26 Nov 2010 09:51:27 +0000

TIRANË- Gjykata e Shkallës së Parë në kryeqytet, e kryesuar nga gjyqtari i vetëm Besnik Hoxha ka rrezuar kerkesen e mbrojtjes per lirimin e Mihal Delijorgjit, Ylli Pinarit dhe Sokol Ngjeçit.
Shkak për këtë kërkesë, sipas avokatëve, është bërë mbarimi i afateve të qëndrimit në paraburgim nga të pandehurit e akuzuar si “arkitektët” e tragjedisë së Gërdecit. Sipas avokatëve, të pandehurit Delijorgji, Pinari dhe Ngjeçi po qëndrojnë në paraburgim jashtë çdo norme ligjore dhe në kundërshtim të plotë me Kushtetutën. “Kanë mbaruar prej më shumë se 91 ditë afatet e paraburgimit për klientët tanë. Pasi që nga momenti i mbylljes së hetimeve dhe dorëzimit të dosjes në gjyq, e deri tani kanë kaluar mbi 12 muaj kohë dhe ndaj tyre nuk ka një vendim. Bazuar në këtë të drejtë, ata duhet të lirohen, pasi ligji parashikon se nëse ndaj personit të akuzuar nuk ka një vendim brenda 12 muajve që nga momenti i dorëzimit të dosjes në gjyq, i ndryshohet masa e sigurisë”-thanë avokatët e tre të pandehurve.
Këto pretendime i kundërshtoi prokurori, duke u shprehur se të pandehurit kanë edhe 2 muaj e 10 ditë kohë për t’i mbaruar këto afate hetimore. Gjyqtari, pasi dëgjoi palët, vendosi të shtyjë seancën gjyqësore për sot në ora 9:30 minuta për t’u shprehur me vendim. Kjo kërkesë e të pandehurve, është rrëzuar kohë më parë nga treshja gjykuese që po shqyrton dosjen penale ndaj 28 të pandehurve të tragjedisë së Gërdecit, ku si pasojë e shpërthimit të 15 marsit humbën jetën 26 persona dhe mbi 300 u plagosën.
Ne seancat e meparshme, Ylli Pinari, ish drejtori i kompanisë MEICO, i pandehur për dosjen “Gërdeci” ka hedhur poshtë akuzat e prokurorisë. Pinari ka mbajtur një deklaratë të gjatë në të cilën nuk ka pranuar asnjë nga akuzat e bëra nga Prokuroria, sipas të cilës Pinari ka favorizuar kompaninë Albademil dhe ka shkelur rregullat në përzgjedhjen e kompanisë së demontimit SAC.
“Kompania SAC nuk ka qenë e paracaktuar, në zgjedhjen e saj nuk është shkelur asnjë rregull”- ka thënë Pinari.
Duke u ndaluar në emailet e shkëmbyera me Patrik Henrin, Pinari ka sqaruar se është folur për procedurat e demontimit.
Ne vijim Prokuroria zbuloi emailet( rreth 20 të dokumentuara në seancë) sipas te cilave duket qartë se kompania e demontimit ka qenë e paracaktuara nga autoritetet shqiptare para se të merrej vendimi për ngritjen e fabrikës në Gërdec.
Sipas emaileve që paraqitura nga Prokuroria emailet e shkëmbyera tregojnë se SAC ishte përzgjedhur ndërkohë që ende nuk ishte përgatitur baza ligjore për një gjë të tillë.
Prokuroria ka zbuluar se Henry dhe Pinari janë ndërmjetësuar nga një shtetas zviceran me banim në Amerikë i cili ka qenë edhe më herët në Shqipëri për probleme të demontimit.
Madje sipas akuzës, Albademil është përzgjedhur nga Ylli Pinari dhe kjo zgjedhje është bërë për interesat e tyre.

Selmanllari në gjykatë mohon firmën dhe pasaportën e tij
Rrahman Selmanllari, miku i familjes së kryeministrit, i akuzuar si i implikuar në një sërë çështjesh të dyshimta, dëshmoi dje në gjykatë për Gërdecin. Ai është paraqitur përpara togave të zeza duke mohuar çdo lidhje me procesin e demontimit, madje duke mohuar edhe firmën dhe pasaportën e tij që ndodhen në dokumentet e kompanisë. Selmanllarit nuk iu kujtua nëse kishte hedhur firmën në një shkresë të nënshkruar nga Patrik Henry (pronari i kompanisë SAC) ku ai emërohej përfaqësues për Shqipërinë. “Nuk më kujtohet fare. Unë nuk di gjë për këtë. Nuk kam lidhje fare”,-iu përgjigj Selmanllari pyetjes së prokurorit Altin Dumani në lidhje me shkresën e sekuestruar gjatë fazës së hetimit, ku Patrik Henri e autorizonte si përfaqësues të tij. Vetë amerikani Patrik Henri ka thënë se ka emëruar Selmanllarin me propozim të Ylli Pinarit. Madje bashkëngjitur në shkresë është edhe fotokopja e pasaportës së Selmanllarit si dhe firma e tij. Një tjetër dokument shkresor që implikon Selmanllarin është edhe procesverbali i tërheqjes së tre arkave me fishekë. Miku i kryeministrit ka firmosur në këtë shkresë më datë 15 maj 2007 por dje në gjykatë e ka mohuar. Edhe dëshmitarë të tjerë e kanë përmendur emrin e Selmanllarit në proces por ai ka mohuar dje gjithçka. Për çudi, edhe prokuroria nuk ka insistuar aspak për të ballafaquar përgjigjet e dëshmitarit me dokumentet shkresore.

Burimi: Shekulli Online

‘Gërdeci’, familjarët e viktimave ankimojnë vendimin ndaj Mediut

Enea — Mon, 08 Mar 2010 18:34:41 +0000

TIRANË- Pas vendimit të Gjykatës së Lartë për pushimin e çështjes ndaj ish ministrit të Mbrojtjes Fatmir Mediu, aktualisht kreu i Mjedisit, familjarët e viktimave të Gërdecit i janë drejtuar këtij organi me një ankimim.
Sot në mesditë, përfaqësuesit ligjor të Familjeve te Viktimave te Gerdecit kanë depozituar prane Gjykates se Larte ankimin per vendimin e marre nga kjo gjykate per mos fillimin e ceshtjes ndaj Fatmir Mediut.
Ne fillim te ketij muaji, Gjykata e Lartë shpëtoi për të dytën herë Fatmir Mediun, paditur nga të dëmtuarit e Gërdecit.
Pas një seance të gjatë, Kolegji Penal i Gjykatës së Lartë arsyetoi se dosja me 400 faqe e dy personave nga Gërdeci që fajësojnë Mediun për dëmin që iu shkaktua nga shpërthimi i 15 Marsit nuk ka asnjë provë që fajëson Fatmir Mediun dhe si rrjedhim nuk është me vend kërkesa për heqjen e imunitetit.
Pas kësaj, kanë reaguar ashpër familjarët e viktimave, duke e cilësuar të padrejtë vendimin e Gjykatës. Zamira Durda, nena e djalit te vogel qe humbi jeten si pasoje e shperthimit ka deklaruar se me kete vendim te padrejte nuk mbyllet beteja e tyre.
“Ne nuk dorezohemi, do te vazhdojme betejen tone, deri sa te vendoset drejtesia. Ne ate tragjedi u plagosën 300 vetë, ndaj do te kete kerkesa te tjera ne gjykate. Do vazhdojmë pafundësisht të kërkojmë drejtësi, në të gjitha mënyrat”- ka thene ajo, pas mbylljes se seances se sotme.
Me heret, avokati i Fatmir Mediut, Ardian Visha, akuzoi Prokurorinë e Përgjithshme se po nxit banorët e Gërdecit të padisin ministrin. Gjatë seancës së sotme në Gjykatën e Lartë, Visha u përball me banorët e Gërdecit të cilët akuzojnë Mediun për plagosje në rëndë shkaktuar nga pakujdesia. Ish-ministri i Mbrojtjes, aktualisht minister i Mjedisit nuk mori pjesë në gjyq. Ndër të tjera avokati tha se kjo është një çështje juridike, por politike.
Avokati kundërshtoi dosjen me 69 prova që fajësojnë Mediun si përgjegjës për ngjarjen e rëndë në Gërdec më 15 Mars të viti 2008. “Kjo dosje është brumë i gatuar keq nga Prokuroria e Përgjithshme që ua servir familjarëve për të bërë petulla sipas dëshirës”, u shpreh avokat Visha.
Kaq ka mjaftuar për të ngjallur debatin në sallën e gjyqit. Banorja Zamira Durda, u shpreh se kjo s’është e vertetë. “Është djali im i vdekur nga vendimet dhe urdhërat e Mediut”, tha ajo.
Avokatët e banorëve paraqiten një dosje voluminoze të format DVD me fakte që ndodhen edhe në dosjen e parë të pushuar nga Gjykata e Lartë për shkak se Mediu fitoi imunitetin më 2 shtator.
Avokati i Mediut tha se “Gjykata e Lartë nuk mund të disponohet dy herë mbi të njëjtat prova”.Ndërkohë Kolegji Penal i Gjykatës së Lartë ka marrë në dorëzim provat dhe pritet që rreth orës 12:30 të dalë me një vendim nëse do të nisë shqyrtimin e kësaj padie apo jo.
Seanca e sotme gjyqësore në ngarkim të ish-ministrit të Mbrojtjes, Fatmir Mediu i cili akuzohet tashmë për plagosje të rëndë, shkaktuar nga pakujdesia ka nisur rreth orës 10:00.
Pala akuzuese që ka paditur ish-ministrin e Mbrojtjes, pretendon se Mediu është fajtor për dëmin fizik që iu është shkaktuar atyre.
Në seancën e datës 15 shkurt nuk u arrit marrëveshja e pajtimit mes të dëmtuares Alketa Hazizaj dhe ish-ministrit Mediu. “Nuk e fal Fatmir Mediun”. Kështu ka deklaruar në Gjykatën e Lartë një nga të plagosurat e tragjedisë së Gërdecit. Ky është rasti i dytë kur tentativat e gjykatës për të pajtuar Mediun me banorët dështojne. Seanca pajtimore pason atë të 25 janarit, kur babai i 12 vjecarit Roxhers Durda nuk pranoi ta falë Mediun.
________________
Fatmir Mediu, ish ministri i Mbrojtes, aktualisht kreu i Mjedisit do të përballet me gjyqin, pas padisë së bërë nga 12 vjeçari Roxhers Durda, i cili humbi nënën gjatë shpërthimit të 15 marsit në Gërdec, ndërkohë që vetë pësoi dëmtime trupore.

Pas një seance që zgjati rreth tre orë, cilësuar si seanca e pajtimit, paditësi nuk ka pranuar të bjerë në ujdi me Fatmir Mediun, duke mos e pranuar kërkesën e tij për falje.
Krahas kësaj padie, Mediu përballet po sot me një padi të dytë depozituar nga Alketa Hazizaj, edhe kjo e dëmtuar e tragjedisë.
Mediu është paraqitur në Gjykatën e Lartë rreth orës 09:00, shoqëruar nga avokatët e tij mbrojtës dhe më pas ka hyrë në sallën e gjyqit, për të qenë i pranishëm para togave të zeza në seancën e sotme.
Tragjedia e Gërdecit po shqyrtohet e ndarë në pjesë. Gjyqi i madh po bëhet në Shkallën e Parë me plot 29 të pandehur, shumica ish-ushtarakë dhe 3 drejtues të fabrikës së demontimit të armëve, të vetmit nën arrest.
Gjykata e Lartë caktoi ne fillim te muajit dhjetor te vitit te shkuar dy trupa gjyqësore për dy padi të ndryshme mbërritur në këtë gjykatë nga të dëmtuarit e tragjedisë së Gërdecit. Ata akuzojnë ish-ministrin e Mbrotjes, Fatmir Mediu për plagosjen e tyre si pasojë e shpërthimit tragjik të fabrikës ku humbën jetën 26 vetë dhe u plagosën qindra të tjerë. Në shtator Gjykata e Lartë pushoi çështjen në ngarkim të Mediut, pasi mori mandatin e deputetit. Tani prokuroria do të kërkojë sërish heqjen e imunitetit të tij.
Trupa gjykuese për padinë e palës së demtuar të minorenit të plagosur në Gërdec, Roxhers Durdaj i përfaqesuar nga i ati, përbëhet nga Arjana Fullani, Relatore e Çështjes, Gani Dizdari, Mirela Fana, Majlinda Andrea, Aleksandër Muskaj.
Gjithashtu, Mediu është paditur edhe nga një tjetër person i dëmtuar nga tragjedia e Gërdecit. Çështjen ku i paditur është Mediu edhe paditës shtetësja Alketa Hazizaj do ta gjykojë trupa e përbërë nga Andi Çeliku, Relator i Çështjes, Ardian Nuni, Irma Bala, Evjeni Sinoimeri, Evelina Qirjako.

Gazeta Shekulli

“Gërdeci”, arrestohet personi që denoncoi Selmanllarin

Enea — Tue, 02 Feb 2010 11:21:54 +0000

UPDATE – Brigadieri është arrestuar me akuzën e dëshmisë së rreme në gjykatë por ai është bërë i njohur kohë më parë për një tjetër fakt shumë të rëndësishëm.
Veiz Muça është njeriu i vetëm që ka denoncuar implikimin e djalit të kryeministrit, Shkëlzen Berishës në tragjedinë e Gërdecit. Ky implikim ka ndodhur nëpërmjet mikut të tij, Rrahman Selmanllari, i cili drejtonte punimet në fabrikën e vdekjes.

Pak ditë pas shpërthimit tragjik, Muça ka rrëfyer për lidhjet e familjes kryeministrore si dhe për “Xhimin”, baxhanakun e Sali Berishës, i cili drejtonte operacionet në Gërdec.

I pyetur për “Xhimin”, Berisha tha në atë kohë se i vinte keq që kishte vdekur por nuk kishte arritur që ta njihte. Dëshmitë e Muçës për personat e rëndësishëm që drejtonin Gërdecin nuk “kanë rënë në vesh të prokurorisë”, e cila është kapur me të në lidhje me faktin që punonin apo jo të mitur në Gërdec. Ende nuk dihet nëse dëshmia është ndryshuar nga frika apo ka ndonjë arsye tjetër.

Muça është pyetur dje nga prokuroria në lidhje me funksionimin e fabrikës së Gërdecit por përgjigjet e tij kane qenë kryesisht të paqarta ose është mjaftuar me thënien “nuk e mbaj mend”. Edhe trupi gjykues është habitur me përgjigjet e dëshmitarit dhe disa herë i tërhoqi vëmendjen duke i thënë se po dëshmonte nën betim dhe duke i kërkuar që të jetë më i qartë në përgjigjet që jepte.

Pas dy orë deklarime kontradiktore dhe të kundërta me ato çfarë kishte deklaruar në prokurori, këta të fundit urdhëruan dy oficerët e çështjes që ishin të pranishëm në sallën e gjyqit, që të kryejnë veprimet procedurale me arrestimin e tij për akuzën e “dëshmisë së rreme”.

Me të dalë nga salla e gjyqit, efektivët e Drejtorisë së Policisë së kryeqytetit i vendosen prangat dëshmitarit Muça. Prangosja e ish-brigadierit të punishtes së demontimit iu vendosen në sy të shtatë dëshmitarëve të akuzës që po prisnin për të hyrë në sallën e gjyqit për të dëshmuar.

Avokati i vetëm që u interesuar për mos arrestimin e përgjegjësit Muça brenda ambienteve të Gjykatës ishte avokati Arben Prifti që mbron interesat ligjore të të pandehurit Dritan Minxholli, i cili i kërkoi oficerëve që mos ta arrestonin ish-brigadierin e kësaj punishte. Por, kjo kërkesë e mbrojtësit nuk u miratua nga oficerët, të cilëve iu drejtua me fjalët “se unë do ta marr në mbrojtje të arrestuarin dhe do të vij në Drejtorinë e Policisë për të qenë i pranishëm si mbrojtës i tij ligjor”.

Ndërkohë, sipas prokurorëve të çështjes dëshmitari Muça në deklarimet e tija është shumë kontradiktor dhe ndryshe nga ato çfarë ka deklaruar para prokurorëve në fazën hetimore. Në sallën e gjyqit dëshmitari Muça deklaroi se në momentin e shpërthimit të fabrikës ai së bashku me të pandehurin Dritan Minxholli ndodheshin në restorant për të ngrënë drekë, ndërsa para oficerit kish deklaruar se “ishim rrugës duke ikur te restoranti për të ngrënë drekë”.

Gjithashtu i arrestuari Muça deklaroi se në fabrikë nuk kishte të punësuar fëmijë të mitur, ndërkohë, para oficerit të prokurorisë kishte thënë të kundërtën, duke dhënë edhe detaje në lidhje me kontrollin e certifikatave të lindjes këtyre të miturve.

Kontradikta tjetër që u konstatua nga prokuroria, ishte fakti se në fabrikë gjatë punës së demontimit Muça deklaroi në sallën e gjyqit se nuk kishte pas ndonjë incident tjetër, ndërsa para prokurorisë kishte shpjeguar nj rast kur një arkë me fishekë kishte marrë zjarr. Gjatë deklarimit të djeshëm, Muça theksoi se në kishte parë në fabrikë amerikanin Patrik Henry e një tjetër me emrin Rodi, ndërkohë gjatë fazës së hetimit nuk i kishte përmendur këta shtetas të huaj.

Në fjalën e tij ai pranoi se aty punonte edhe baxhanaku i kryeministrit Sali Berisha i ndjeri Muhamet Hoxha i cili bashkë me një grup personash të tjerë numëronin arkat e fishekëve dhe predhave që vinin nga depot e armatimeve të Ushtrisë.
*****
Dëshmitë për Gërdecin: Fabrika ishte hapur para se të jepej leja

UPDATE – Ka vijuar sot seanca gjyqësore në ngarkim të 26 të pandehurve të Gërdecit, me dëshmi të reja të ish-punëtorëve që hedhin dritë mbi ngjarjen e rëndë.
Kështu, sot, roja i fabrikës ka deklaruar se kishte filluar punë në shkurt të 2007-ës, kohë kur me letra fabrika nuk figuronte.

Në dosjen e prokurorisë për Gërdecin rezulton se “në v.2007 ende nuk ishte shpallur vendi ku do demontoheshin municionet dhe vetem nje muaj me pas qeveria ka marrë vendimin për proceduren e trajtimit të armëve, teknikes dhe pajisjeve të forcave te armatosura te hequra nga armatimi dhe perdorimi”.
Po sipas prokurorisë, që i referohet shkresave zyrare janë dashur edhe tre muaj të tjerë që Ministria e Mbrojtjes të nxjerrë një urdhër për përzgjedhjen e kompanise së huaj ‘Sac’ dhe shoqerine e nenkontraktuar ‘Albademil’ per proceduren e shitjes se municioneve me gezhoje tunxhi.
Me dëshminë e sotme të ish-rojes Beqir Prini, prokuroria duhet të ballafaqojë dokumentet e sekuestruara, për të hedhur dritë mbi të dhënat e reja mbi tragjedinë që mund të rëndojnë pozitat e të akuzuarve.
***
Tre dite me pare deshmuan 10 ish-punonjës të fabrikës, mes tyre edhe disa fëmijë. Ndër të tjera ata i thanë trupës gjyqësore se në fabrikë punonin edhe disa amerikanë edhe pse nuk mundën të japin prova të tjera, si emrat apo funskionet e tyre.
Ndërkohë njëri prej të pandehurve, ish-ushtaraku Sokol Ngjeci, ish-mbikëqyres i MEICO-s, akuzoi prokurorinë se po ua bën gabim pyetjet dëshmitarëve.
“Nuk mundet që prokurori të pyesë: A ishin demontuar armë, sepse Forcat e Armatosura nuk kishin dërguar armë por municione”, tha ai. Kjo kërkesë nuk u mor parasysh dhe seanca vazhdoi normalisht sipas rendit.
Dhjetë personat e pyetur sot rrëfyen rrethanat si ishin punesuar ne kete fabrike dhe si ndodhi shperthimi. Dëshmitë e tyre ishin të ngjashme me ato të ish-punëtorëve të tjerë që kanë dëshmuar në këtë proces.
Deshmitaret i thane gjykates se mes te pandehurve njihnin, Dritan Minxhollin me detyre ish- drejtor i fabrikes. Sipas tyre, ai ishte punedhenesi i tyre.

***
Gjykata e Lartë ka nisur me 15 Janar shyrtimin e padisë ndaj Fatmir Mediut, ish ministër i Mbrojtjes, i paditur nga te demtuarit e tragjedise se Gerdecit. Seanca nuk zgjati shumë, ajo u shty me justifikimin se i pranishëm duhet të ishte edhe vete Mediu, i cili përfaqësohej nga avokatët mbrojtës. Sipas trupit gjykues, kryesuar nga gjyqtarja Ariana Fullani, seanca e radhës do të jetë në datën 25 janar.
Shqyrtimi në gjykatë vjen pas padisë së dorëzuar nga familjarët e viktimave, konkretisht nga 12-vjeçari Roxhers Durda, i cili humbi nënën në tragjedinë e Gërdecit.

Vetem një dite me pare, familjarët e viktimave të Gërdecit i bën apel prokurorisë të përgjigjet për padinë e tyre ndaj ish ministrit të Mbrojtjes Fatmir Mediu. Gjatë një deklarate për mediat, ata kujtuan se kërkesa-padia është dërguar që në muajin nëntor, ndërkohë që nuk kanë marrë asnjë përgjigje.

Sipas tyre, duke qenë se afati ligjor për kthimin e përgjigjes ka kaluar dhe Prokuroria po hesht ata do të përgatisin hapat përkatës për ta kërkuar këtë të drejtë përmes sistemit gjyqësor.

“Nëse institucioni i Prokurorisë nuk siguron kthimin e një përgjigje shumë shpejt, një përballje gjyqësore ndërmjet palës së dëmtuar dhe organit të akuzës, do të jetë e pashmangshme”- tha kreu i Shoqatës së Familjarëve të Viktimave të Tragjedisë së Gërdecit, Feruzan Durda.

Sipas tij, në emër të shoqatës, pas pranimit të kërkesë-padisë sonë në kuadër të të plagosurve të tragjedisë nga Gjykata e Lartë, që në muajin nëntor i jemi drejtuar Prokurorisë së Përgjithshme me kërkesën për procedim të Fatmir Ali Mediut. Me anë të kësaj u kërkua që Prokuroria të kryente veprimet e duhura për procedimin e fajtorit të shpërthimit. Gjithashtu, u kërkua që Prokuroria e Përgjithshme të kërkojë autorizimin për procedim në mënyrë që Kuvendi të votonte për heqjen e imunitetit, çka do bënte më pas të mundur vënien para drejtësisë të Fatmir Ali Mediut.

Gazeta Shekulli

“Gërdeci”, Delijorgji e Minxholli kapen me celular në qeli

Enea — Fri, 22 Jan 2010 08:55:44 +0000

TIRANË- Grupi i gatshëm pranë paraburgimit “Jordan Misja” në kryeqytet, pas krehjes së qelive të këtij institucioni i gjen dhe i sekuestron nga një aparat celular “arkitektëve” të fabrikës së “ferrit” në Gërdec, të pandehurit Mihal Delijorgji dhe kunatit të tij Dritan Minxholli. Lajmi konfirmohet nga burime zyrtare të Drejtorisë së Përgjithshme të Burgjeve, që saktësuan se gjatë kontrollit në qelitë e paraburgimit 313, u gjetën e u sekuestruan 6 aparate telefonash celularë. Nga të njëjtat burime mësohet se dy prej këtyre celularëve janë gjetur në qelitë e administratorit të kompanisë “Albademil”, Mihal Delijorgji dhe në qelinë e drejtorit teknik kompanisë Dritan Minxholli, të dy të akuzuar për tragjedinë Gërdecit.

“Aparati celular me kartën e njërit prej tre kompanive të telefonisë së lëvizshme në vend iu gjet në frigorifer Mihal Deligjorgjit, i cili e pranoi se qe i tij, por pa dhënë shpjegime se si ka arriti telefoni në dhomën e tij. Nga këqyrja e aparatit dhe kartës, ka rezultuar se numri nuk ishte me kontratë por ishte me me kart rimbushëse me ofertë”- thanë burimet të burgjeve, ndërsa lanë të kuptohej se Delijorgji po shfrytëzonte ofertat e kompanive telefonisë. Ndërkohë, aparati tjetër me kartën në të u gjet në qelinë e Dritan Minxholli, që kishte numrin e të njejtës kompani me të kunatit të tij Mihal Delijorgji dhe ishin brenda grupit të ofertës së dhënë nga kompania e telefonisë. Këto burime konfirmuan se nga kontrolli i ushtruar për tri ditë rresht në këtë institucion ndaj të paraburgosurve u gjetën edhe 4 celularë bashkë me kartat SIM në to.

“Nga kontrolli i është gjetur një aparat bashkë me numrin edhe Fatbardh Dullës, i cili gjykohet në Gjykatën e Krimeve të Rënda për akuzën e “trafikut të lëndëve narkotike” në bashkëpunim. Tre numrat e tjerë bashkë me aparatet i janë gjetur në dhomat e paraburgimit të të miturve. Zyrtarëve të këtij paraburgimi, thanë se kontrollet do të vazhdojnë për të parandaluar futjen dhe mbajtjen sendev të paligjshëme. “Kontrolli ndaj qelive të paraburgimit do të vazhdojë dhe është forcuar kontrolli i ushqimeve që futën në institucion, ai ndaj familjarëve gjatë takimeve si dhe punonjësve të policisë në regjimin e brendshëm”- thanë burimet e këtij institucioni. Sipas tyre, kontrolli në qeli nisi pas gjetjes së një qeseje me hashash në tarracën e ndërtesës së Shërbimit të Provës, institucion i drejtuar nga Arben Sefgjini. Kjo qese është gjetur nga punonjësit e policisë së regjimit të jashtëm. Ndërkaq pak ditë më parë këta efektivë policie gjetën dhe sekuestruar në fushën e futbollit të këtij institucioni dy aparate celularë të mbështjellë me sfungjer. Aparatet, sipas zyrtarëve të burgut, janë hedhur nga dritaret e banjove të Gjykatës së Shkallës së Parë të seksionit penal që ndodhet ngjitur me murin e paraburgimit “Jordan Misja” (313) në kryeqytet.

shekulli.com.al